timothyvoges info@timothyvoges.com
© Timothy Voges. All rights reserved.

Deklarashon di Artista

Den mi obranan di arte mi ta usa imágennan saká for di magazinanan di añanan kuarenta te ku sesenta. E imágennan ku mi ta skohe ta evoká un sierto sintimentu.
Hopi biaha nan ta mustra situashonan diario, pero debí ku nan falta konteksto, nan por fasilmente bira un situashon straño i deskonosí.

Dor di duna nan koló, rekortá nan, kita sierto detaye i fondo di e imagen, mi ke òumentá e sintimentu straño i deskonosí aki.
Lokual ku mi ta usa den mi obranan ta parti di un imagen kompletu. E suhetonan ta wòrdu kita for di nan mes konteksto i ta wòrdu butá den un ambiente nobo. Un ambiente yen di silensio, kaminda tiki ta tuma luga. Un momentu utópiko den tempu, pero ku un tono levemente ominoso.

Un término pa deskribí e sintimentu straño aki ta 'das unheimliche', un término di Freud - 'the uncanny' na ingles - ku ta nifiká un estrañamentu di algu ku ta normalmente familiar, resultando den un sintimentu inkómodo.
Kreando un narativo basá riba silensio i un ambiente inmovibel, mi por distanshá mi mes for di e mundu okupá i anshá ku nos ta biba aden awe, i tuma bèk mi tempu i trankilidat.

Mi ta spera di por ofresé esaki na e personanan ku ta observá mi arte tambe.
Pasó di un falta di konteksto den e imágen ku mi ta produsi, un diálogo ta forma entre e obra i e observadó. E narativo ta habrí pa interpretashon.